الجزائريين قلعوا لنا البنطلونات وعملوا حركات يعاقب عليها القانون ...وشتموا مصر

ابراهيم حسن من الجزائر : الجزائريين قلعوا لنا البنطلونات وعملوا حركات يعاقب عليها القانون ...وشتموا مصر

دافع ابراهيم حسن مدير الكرة بالنادى المصرى عنه وشقيقه بعد الهجوم الذى شنته عليهما الصحافة الجزائرية وقرار اتحاد الكرة بايقافهما وقال ابراهيم أن جماهير الجزائر اعتدت على اللاعبين وعليه وشقيقة
واضاف : أنا مصر على موقفى لان الجمهور اللى كنا بنلعب قدامه يستحق هذا الرد وهم استفزونا فى الاول والحكم استفزنى اكثر من مرة ومسك بقى لما باقولله ان عندى لعيب اتعور ومنعنى علشان ما ابلغشى الحكم الاساسى للمباراة وكان هيكسر ايدى وبينادى عليهم علشان يطردونى ، وانا خارج الجمهور فى المدرجات قلعولنا البنطلونات وعملوا حركات يعاقب عليها اى قانون فى العالم ، وعلشان كده ردينا بهذا الشكل ، وهى دى لغتهم اللى اتعودوا عليها من زمان علشان كده انا عملت الحركة دى وكنت اقصد بيها ناس غلطت فى مصر وفيا انا وشقيقى والفريق وفى سفراء مصر .
اضاف ابراهيم لبرنامج 90 دقيقة ردا على سؤال ان ما حدث اشعل فتيل فى العلاقة بين البلدين : الفتيل موجود من زمان بيا او بغيرى ودول شمال افريقيا مش بيحبونا اصلاً ، لكن مشكلتنا اننا بنغرس دماغنا فى الرمل زى النعام واحنا عارفين مين بيحبنا ومين بيكرهنا
وتساءل ابراهيم : مش كل فعل له رد فعل ؟ احنا فى منافسة مليئة بالعداء ولو فزنا ماكناش طلعنا من الملعب ، الناس كانت بتضربنا بصواريخ نار ولعيب دخلت شظية فى رجله واحنا استضفنا هذا الفريق وجمهوره بكل ترحاب واللاعبين كانوا بيلفوا التراك والجمهور بيسقف لهم ويحييهم واحنا استقبلونا بالصواريخ النار
اكمل ابراهيم : انا لا ابرر موقفى ولو تكرر الامر لفعلت مافعلته مرة اخرى ولن اغير موقفى

وقال معلقا على اتهام حسام وابراهيم بالاساءة الى العلاقات قبل تصفيات كاس العالم : اللى ايده فى المية مش زى الى ايده فى النار ، وهل كنتوا هتبقوا مبسوطين لو لاعب جه مولع او اتفقعت عينه ؟ !!
انا جايب لكم النار اللى كانت بتتحدف علينا ومصر اتشتمت بالاسم واسال اللى كان هناك .