حسام وابراهيم يقدمان شهادتهما فى 90 دقيقة : لن نعتذر الا بعد اعتذارهم ..وميدو يؤيد التوأم : الجزائريين طول عمرهم كده

حسام وابراهيم يقدمان شهادتهما فى 90 دقيقة : لن نعتذر الا بعد اعتذارهم ..وميدو يؤيد التوأم : الجزائريين طول عمرهم كده

ادلى كل من حسام حسن وابراهيم حسن بشهادتهما الكاملة حول ماجرى فى الجزائر ، استضافهما برنامج 90 دقيقة على الهواء ليتحدثا عن الواقعة بكافة تفاصيلها ، وبدأ ابراهيم حسن الحديث بقوله : اللى شافته الناس ده كان مرتب ونتيجة تركيز الكاميرا على فى كل حركة والناس فاكرة ان معنى اللى حصل فى الجزائر ان الماتش كان صعب ، رغم ان طول عمر ماتشاتنا مع المغرب والجزائر صعبة وفيها عداء رياضى شديد ولكل فعل رد فعل واحنا دخلنا الملعب من اول ثانية ولسة بنسخن والصواريخ تلقى علينا والشتائم كذلك ، وكان هناك مصريين فى المدرجات وشتيمة مصر كانت حقيقية وانا مش هاقول حاجة ماحصلتش ، وعندنا لعيب جاءت له شظية فى فانلته والحاجات دى موجودة بمجلس ادارة النادى وطارق سليمان المدرب العام دخل صاروخ فى بنطلونه وجرينا على الحكم بنشتكى قبل ما بندأ المباراة لكن المراقب اتحايل علينا علشان نبدأ اللعب
اضاف ابراهيم : بعد الجون الاول لم نرى بعض من كثرة الصواريخ النارية وجرينا على نص الملعب وقلنا مش هنلعب رجع اتحايل علينا تانى وقال ماليش دعوة هتلعبوا كده والبوليس الجزائرى هناك معروف انه لا يعرف أن يسيطر على الجماهير ، وكان فاضل 5 دقايق واللى نزلناه فى التغيير جت له شظية ورحت على نص الملعب وحتى الاطفال اللى بيجيبوا الكورة مشوهم خالص ، وهتلاقى لقطة وباظهر فيها وانا باجيب الكورة وبنادى الحكم واقول له مفيش حد يجيب الكورة ، لقيت الحكم الرابع بيخبط فى ايدى وماسك صباعى ، وكان هيكسره ، وازقه مش عايز يسيبه وطبيعى ازقه لان مش من حق حد يلمسنى ...
اكمل ابراهيم : الحكم الرابع امر الحكم فى الساحة باخراجى والمفروض اللى يقرر ده حكم الساحة ، وبعدها بدأ الناس يحدفوا حاجات وشتيمة وحركات بالايدين وهى دى ثقافتهم

ويضيف ابراهيم حسن : هم اذكياء جدا لان الناس لم تظهر فى الكادر وماحدش شاف الحركات اللى عملها الجمهور
ودافع عما ارتكبه من حركات بقوله : انا باعمل كده علشان الناس عملت حركات اسوأ واالعيبة اتعورت وكان لازم الرد عليهم بطريقتهم ودى ممكن تكون تصرفات مشروعة فى الجزائر


حسام يعترف : ماحدث خطأ

وقال حسام حسن فى البرنامج : احنا بنعترف ان اللى حصل ده خطأ لكن الخطـأ كان فى رد ابراهيم بالطريقة دى لان الناس بتتكلم وهى مستريحة فى المكان ، لكن اللى احنا شفناه كان طلقات نارية بتعمل شظايا ، ورغم ان الطوبة بتلغى ماتش لكن هذا لم يحدث معنا وكان نفسى يتم استدعاء اللاعب على سمير ويعرض على الطب الشرعى لاثبات الاصابة فى رجله ، وفيه ناس ممكن غيرتها على بلدها ممكن تدفعها للرد بالشكل ده

سأل معتز الدمرداش ابراهيم حسن : مافكرتش تعمل اعتذار ؟
قال ابراهيم : انا عايزهم يعتذروا هم الاول ليا ولمصر وانا اعتذر ، لكن الصحافة المصرية قدمتنا على طبق من فضة للجزائر وخلوهم يشتمونا فى صحفهم

وحول ما يعتزمه التوأم بعد الاقالة قال حسام : قرار مجلس الادارة لم يؤذينا فى شئ الا ابعادتا عن جمهوربورسعيد وفريق تكون بصعوبة وهم هدوه بالقرار ده اللى هو خراب على النادى المصرى

ساله معتز : ولو تم التراجع عن القرار ؟ فقال : مش هارجع الا لما الربعة اللى فى مجلس الادارة وهم عارفين نفسهم يبقوا مش موجودين وجمهور بورسعيد مش عايزهم وعارفهم كويس ، واحنا متمسكين بجمهور بورسعيد جداً والنادى المصرى لكن المجموعة دى ماينفعش تشتغل معاها ...

اضاف : النهاردة كان فيه مباراه فى بورسعيد والجمهور دخل وهو شايل يفط لنا بتأيدنا وفيه لاعبين رفضوا نزول التمرين وهذا يعنى ان فيه خطأ كبير ارتكبه ناس وثق فيهم الراحل الحاج سيد متولى


شهادة رئيس البعثة فى صالح التوأم
بينما اكد الكابتن سيد النمر عضو مجلس ادارة المصرى ورئيس البعثة انه شاهد كمية صواريخ بتتحدف لاول مرة والكابتن حسام لم يكن فى الصورة والكابتن ابراهيم راح للحكم الرابع يتكلم معاه واللى حصل فيه ظلم لابراهيم لان فيه اشياء كثيرة لم تسجلها الكاميرات من الجماهير والحكم الرابع ،وقلت لزملائى بالمجلس ان قرار اقالة التوام متسرع وكان المفروض يستنونا لما نرجع

وأحمد حسام ( ميدو ) يشهد لصالح التوأم

قال ميدو على الهاتف لمعتز الدمرداش : عايز اوضح ان فى 2—2 لما كنا فى الجزائر مع الجوهرى اتعرضنا لجميع انواع الاهانات وجو ارهاب قبل المباراة بايام وتليفونات تهديد وبعد المباراه قعدنا 4 ساعات علشان نقدر نخرج من الاستاد
واضاف احمد حسام : اكثر ناس فى تاريخ الكرة المصرية عملت قيمة لمصر حسام وابراهيم وانا ضد مافعله ابراهيم لكن لازم نتفهم الضغط ولازم الاعلام واتحاد الكرة يقف جنب ابراهيم وحسام مش يذبحهم وكانهم سبب حدوث مشكلة بين الكرة المصرية والجزائرية رغم ان المشكلة موجودة من 20 سنة